На указанный в форме e-mail придет запрос на подтверждение регистрации.

Регистрация





Дохил шудан ба RAP.TJ



Дохил кардани треки нав



Фото для трека
Трек
Хунармандон
Масани (Тоҷикистонов)

Масани (Тоҷикистонов)

(Faridun) Фаридун Саидов
19 Июн 2015
2795 просмотров

Ному насаб: Масрур Зокирзода

Зодрӯз: 30.01.1992

Зодгоҳ: ноҳияи Фархор

Суроға: ш. Душанбе, кӯчаи Фирдавсӣ, маҳаллаи 63

Тахаллуси эҷодӣ: Масани (Тоҷикистонов)

Шуғли дӯстдошта: хондани китобҳои бадеӣ, кор бо луғатҳои англисӣ – тоҷикӣ; варзиш – футбол (мухлиси дастаи Барселона), билярд, баскетбол, бодибилдинг, гӯштин; хондани РЭП.

Хӯрокҳои писандида: Ҳамаи таомҳои миллӣ (ош, манту, қурутоб, лағмон);

Нӯшокӣ: дуғ, чолоб, ҷурғот, афшураи ҳамаи меваҳо

Суроғаи электронӣ: taj_rap_masani@mail.ru

Зокирзода Масрур дар яке аз деҳоти зебоманзари ноҳияи Фархори бостонии минтақаи Кулоб, дар яке аз рӯзҳои сарди фасли зимистон – 30-юми январи соли 1992 дар оилаи зиёӣ таваллуд шудааст. Падару модараш касби омӯзгориро пеша кардаанд ва соҳиби ду фарзанд, ду писар гашта буданд. Масрур фарзанди дуюми оила буд. Соли 1995 аз Фархор ба Душанбе, ба кӯчаи Неъмат Қарабоев кӯч бастанд. Соли 1998 дар 6 солагӣ қадамҳои нахустинашро ба даргоҳи илму адаб, мактаби миёнаи рақами 28-и ноҳияи Фирдавсӣ гузошта, то синфи чаҳорум таҳсил кардааст. «Ҳанӯз ҳам меҳри омӯзгори аввалинам – Соҳибназарова Гулизор аз дилам гум нашудааст ва ҳамеша ӯро дар хотир дораму бо дуои муаллима ба қуллаҳои баланди илм ва зиндагӣ расидаам» - мегӯяд Масрур.

Соли 2002 аз кӯчаи Н. Қарабоев ба маҳаллаи 63-юми кӯчаи Фирдавсии пойтахт мекӯчанд ва таҳсилро дар мактаби миёнаи №30 аз синфи панҷум идома медиҳад. Соли 2006 бародараш Шараф Зокиров дар синни 16 солагӣ дар дарёи деҳа дар Фархор, ҳангоми оббозӣ ғарқ мешавад ва ҷон ба Ҷаббор месупорад ва акнун Масрур танҳо буд, танҳо дар оила бо падару модараш…

Соли 2009 мактаби мазкурро бо аттестати аъло хатм менамояд. Тӯли таҳсил дар ин мактабҳо соҳиби 4 ифтихорнома мегардад. Омӯзгорон ӯро ҳамчун талабаи фаъол, кунҷкоб, толибилм, зи ҳар гӯша хӯшачин, ҳақиқатҷӯ, поквиҷдон ва дорои дигар сифатҳои неки инсонӣ баҳо медиҳанд.

Эҳсосу бебаҳову гуворотарин – ишқ, ки ба баъзан нафарон онро Худованд насиб намегардонад, маҳз дар даврони мактабӣ ба Масрур муяссар гардидааст. Ҳанӯз дар синфи 8-ум таҳсил мекард, ки ба духтаре дил мебандад, аммо сирри дилашро фош намекунад…

Нисбат ба фанҳои дақиқ зиёдтар фанҳои гуманитариро меписандид. Ҳамин буд, ки соли 2009 ба Донишкадаи давлатии забонҳои Тоҷикистон ба номи Сотим Улуғзода ба факултети забонҳои романию германӣ, бахши забони англисӣ – тарҷума ҳуҷҷатҳояшро супурда, ба курси аввал дохил мешавад. Аз рӯзи аввал то имтиҳоноти давлатӣ вазифаи сардори гуруҳро ба уҳда дошт. Дар ҳама гуна чорабиниҳо, чӣ илмӣ бошад, чӣ фарҳангӣ фаъолона ширкат меварзид. Аллакай ба ҳамагон худро мусбӣ шиносонд. То курси 5-ум аллакай соҳиби 3 ифтихорнома барои ишғоли ҷойҳои якум дар озмуни «Тарҷумони беҳтарин», ки соле як маротиба баргузор мешавад, гардид. Тӯли таҳсил дар ҷойҳои намоён аз қабили ширкати Caritas, Фонди ҷамъиятии Internet, Мактаби Байналмиллалии Президентӣ таҷрибаомӯзӣ кардааст.

Соли 2014 донишкадаро бо дипломи аъло (сурх) хатм менамояд ва бо хоҳишу дархости декани факултет ва дигар омӯзгоронаш дар ҳамин даргоҳи илму фан мемонад ва аз якуми сентябри соли 2014 ба омӯзгорӣ шуруъ намуда, аз фани забони англисӣ дарс мегӯяд ва аз моҳи октябр вазифаи пурмасъулият ва серталаб – муовини декан оид ба корҳои тарбиявии факултетро бовар карда ба ӯ месупоранд.  Айни ҳол корманди ДДЗТ ба номи С. Улуғзода мебошад.

============================= ФАЪОЛИЯТ ДАР РЭП ======================

Ҳанӯз аз овони хурдӣ, вақте ки Доктор Эмфир ба саҳнаи калон байни ҳунармандони эстрада баромад мекардагӣ шуд, меҳри ин навъи жанр дар дили Масрур шуъла задан гирифт, аммо намедонист ин навъи санъат чӣ ном дораду кӣ онро бояд иҷро намояд. Сипас, аз соли 2006 ба шунидани рэпи «ҳақиқӣ» шуруъ намуд, ҳангоме ки дар пойтахт аллакай Мастер Исмайл ба иҷроиши матнҳои рэп бо забони тоҷикӣ оғоз намуд. Соли 2007, ки аввалин маротиба клипи РЭП бо забони тоҷикиро дар бозор дид, дарк намуд, ки дигар ин санъат дар дилаш аз ҳама гуна санъатҳои дигари овозхонӣ болотар ҷой гирифт. Худи ҳамон сол дар компютери хонагӣ дар бораи маҳаллааш сабте кард, аммо ин ӯро  қонеъ намекард, чунки танзими суруд дар сатҳи паст қарор дошт. Рӯз то рӯз завқи суруд сабт намудан дар дилаш аланга задан мегирифт.

Ҳамин тавр, соли 2008, 28-уми моҳи октябр ҳамроҳи дӯстонаш Ромиш ва Амриддин ба студияи сабти овози АКИ-Рекордз рафтанд. (Аз ин пас ҳар 28-уми октябрро ҳамчун ҷашнвора қайд мегиранд). Таҳти коргардонии Акмал Ҷумаев аввалин сурудашонро сабт карданду гуруҳи эҷодие созмон дода, номашро BBlack 63  гузоштанд. Акнун онҳоро дар минтақаи «Саховат» ҷавонону наврасон мешинохтанд. Сурудҳо пайи ҳамдигар мебаромаданд. Кӯшиш мекарданд, ки моҳе як суруд сабт кунанд.

Сурудҳо дар бораи маҳаллаи 63, дар бораи мактаби миёнаи №30, дар бораи хатми мактаб, бахти сафед азизам, зодрӯз муборак, ишки аввал аз сурудҳои албоми нахустинаш буданд, ки бевосита ӯро дар маҳаллаҳои 63, 61, 64, 46, Гулбутта каме машҳур карданд. Инчунин, албоми дуюм бо номи «Дунёи Ғам» ҳамзамон бо албоми якум сабт мешуд ва бисёртар сурудҳои ишқӣ, умуман лирикиро дар бар мегирифт.

Пас аз бастани албоми дуюм, ба албоми сеюм пардохт. Ромиш ва Амри ба хондани РЭП нуқта гузоштанд. Акнун худаш танҳо буд. Аз ин рӯ, сурудҳоро танҳо сабт мекард. Баъзан аз онҳоро дар ҳамкорӣ бо дигарон омода намуд. Аммо баъд аз чанд муддат (соли 2010) бо рэпери шаҳри Турсунзода МС Ҷамик гуруҳе сохтанд бо номи «СомонТоҷ Лига», аммо ин гуруҳ низ зиёд фаъолият карда натавонист, вале як албом бо 20 суруд сабт гашт. «Дарди ҷамъият» номгузорӣ шуд ин албом. Сурудҳои барҷастаи он «Ғарибӣ», «Тӯҳфа ба Ветеран», «Марги духтараки 8-сола», «Равшани Кӯлоб», «Насиҳати ман ба ту», «MyGame», «Охирон суруди ман»(клип), «Садои дили СомонТоҷ Лига»(клип), «Дарёи умрам»(клип) ва ғайраҳо.

Ин албом низ бо сурудҳои зиёд баста шуд ва Масани пайи албоми чорум шуд. Акнун баъд аз суруди «Садои дили СомонТоҷ Лига», ки суруди патриотӣ буд, ба хондану таълиф намудани ин равия шуруъ кард. Дигар ӯро ҳамчун рэпери патриот мешиносанд. Аз албоми чаҳорум ва нотамоми ӯ бо номи «Тоҷикистон – Модар» якчанд сурудаш аллакай пешкаши ҳаводорони Рэпи Тоҷик гардидааст, аммо барои дигар сурудҳои ба сабт омодашуда вақт лозим аст, ки омода гарданд ва ба мухлисони ашадии созу навои Ватандӯстӣ пешкаш гарданд.

Нахустин клипи Масани ба қавле «Аз бекорӣ кадукорӣ» буд. Яъне бо наворбардораки хонагӣ суруди «Садои дили СомонТоҷ Лига» соли 2011 ба навор гирифта шуд ва онро Акмал Ҷумаев танзим карду он ба халқ пешниҳод гашт. http://www.youtube.com/watch?v=kx7Nfxj-0AI

Клипи дуюм ё нахустин клипи профессионалӣ оне буд, ки сурудаш тӯли 6 моҳ омода шуда, таҳти коргардонии Сафаров Равшан (Лиро) сабт гардид. Худи клип дар фасли сармо – зимистони соли 2012, давоми як моҳ ба навор гирифта шуд, танзимаш бошад аз ин ҳам вақти зиёдро талаб кард. Коргардони клип Акмал Ҷумаев буд. Клип ва суруд дар пайравии суруди «Бахти – Ту арзандаи ман нестӣ» (BahhTee–Ты меня не стоишь) мебошад. Дертар аз ин кори кардааш изҳории пушаймонӣ кард, чун метавонист бо сенария ва матни шахсӣ клипе омода созад. «Аз ин кардаам пушаймонам ва хитобае дорам: Ин аввалин ва охирин кори плагиатии ман мебошад. Аз ин пас ҳаргиз ба ин кор даст намезанам!»- зикр кард Масани.

http://www.youtube.com/watch?v=S7_uypcPbHY

Клипи сеюм бо номи  «GetMyRap, Stim» ба экранҳо баромад. Қиссае дорад ин клип. Масани мегӯяд, «Рӯзе клипи Стимро бо номи «Аэроплан» дар сомонае тамошо карда, алам диламро пахш кард ва гиря гулӯгирам намуд, чунки дар банди дуюми он ӯ худашро чун қаҳрамонони барномаи «Наша Раша» Равшан ва Ҷамшуд кардааст ва гӯиё ӯ тоҷик бошад. Ба чандин рэперҳое, ки бо забони русӣ дар сатҳи баланд суруд хонда метавонанд, муроҷиат кардам, ки мо –Тоҷикон бояд ба онҳо ҷавоб диҳем ва сукутро ихтиёр накунем, гарчанде ҷавоби ахмақ сукут аст. Аммо аз чӣ бошад, ки онҳо ё метарсиданд, ё намехостанд, ё парвое надошданд, ки миллати онҳоро ким-киҳо маломат мекунаду таҳқирҳои бешумор мекунад. Ин алами маро дучанд карду ман ба ин кор даст задам, яъне барои он ки русии ман дар сатҳи на он қадар хуб қарор дорад, бо забони тоҷикӣ ва каме инглисӣ бо рэпер аз Белорусия трэк сабт кардем ва дар клип танҳо худамро ба навор гирифтам»

Клипи чаҳорумро бо Акмал Ҷумаев дар муддати тӯлонӣ банду баст карданд. Аввалан сенарияро тарҳрезӣ карданду сипас оҳанге интихоб намуда, матни онро Масани навишт. Акмал, ки дар сурудани сурудҳои эстрадӣ низ балад аст, банде аз эҷодиёти устод Лоиқ Шералӣ барои нақарот омода намуд. Ҳамин тавр, номи суруд «Дарёи умрам» аз ҳамин банди шеърӣ гирифта шудааст. Суруд моҳи январи соли 2013 дар студияи сабти овоз – «Зион Рекордз» таҳти коргардонии Лиро навишта шуд ва 21-уми феврали ҳамон сол ба навор гирифта шуд. Сенарияаш бошад, дар тобистон. Суруд аслан дар бораи ишқу муҳаббат аст, ки ҷавоне хиёнат дидааст. http://www.youtube.com/watch?v=05_f99CGHZU

Тӯли фаъолияти фарҳангӣ қариб бо ҳамаи эҷодкорони рэп шиносоиву дӯстӣ пайдо кардааст. Он нафаронеро, ки аз овони хурдӣ орзу мекард, ки ақаллан як бор аз наздик бинад, имрӯзҳо бо онҳо равуо дорад. «Хушбахтӣ аз ин зиёдтар намешавад, чун мехостам суруд сабт кунам, кардам. Бо шоҳи Рэпи Тоҷик (ба қавли ӯ) Мастер Исмайл вохӯрам, дӯстӣ пайдо кардам. Бо кумири рақами дуюмам, ки Абада мебошад, дуэт сабт кардем. Бо Акмал Ҷумаев дар ҳамкорӣ чанд клип ба навор гирифтем. Бо Тобиш Ҳилолӣ, сарояндаи беназири санъати эстрадӣ, булбули жанри овозхонӣ, оне ки бо сурудҳои Ватандӯстонаи хеш ҳамаро ба дӯст доштани Ватани азизу маҳбубамон талқин кард, суруд сабт кардам.

https://www.youtube.com/watch?v=gc8uK4YjXdQ

https://www.youtube.com/watch?v=0UFqzQb9bQU

Дар чандин маҷаллаву радиову телевизион чандин маротиба ҳамчун рэпер баромадҳо кардаву мусоҳиба гузаронидаам. Шунавандагоне дорам, ки сурудҳоямро мунтазиранд ва ҷавононе ҳамроҳам ҳастанд, ки идомадиҳандаи равияи пешгирифтаам ҳастанд. Ку бигӯед, хушбахтӣ аз ин зиёд мешавад? На.» - мегӯяд Масрур.

Нахустин консерти ҳунарияш дар шаҳри Хуҷанд, дар толори Кохи Ҷавонон санаи 3-юми июли соли 2010 баргузор шудааст. Инчунин дар бисёр консертҳо, аз қабили консерти гуруҳи Блэк Стайл дар ш. Турсунзода, консерти сарояндагони эстрада ва рэп дар н. Ёвон, консерти рэп дар зодгоҳшаҳраш Фархор, дар базми «Шӯри Ҷавонӣ»-и ТВ Пойтахт ва чандин консертҳои дигар ба ҳайси меҳмон баромад кардааст. Хусусан, моҳи сентябри соли 2010 дар шаҳри Турсунзода дар консерти Мастер Исмайл якҷо бо гуруҳи Ҷаман Коннекшн баромад кардааст. Дар Донишкадаи давлатии забонҳои Тоҷикистон ба номи Сотим Улуғзода ҳамчун нахустрэпер эътироф шудаву  соле як-ду маротиба консерти рэп барпо мекард. Аввалин консерташ дар ин боргоҳи илму адаб санаи 21-уми майи соли 2011 буд, ки пойдевор ё худ асос гузоштани рэп дар донишкада маҳсуб меёбад ва баъд аз ин дигар чорабиние набуд, ки бидуни рэп ва Масани баргузор мешуд. Охирин консерташ, ки бо саҳнаи донишкада бо чашмони ашколуд хайрухуш карду дар ин маҳфил ректори донишкада Зиёев Хуршедҷон, муовини ректор оид ба корҳои тарбиявӣ Қосимзода Идигул, декани факултет Ҳоҷиева Мавҷуда ва дигар ашхоси расмии донишкада ва устодону ҳамкурсон ва мухлисони рэп ҳузур доштанд, санаи 3-юми майи соли 2014 буд, ки бо дур шудани Масани аз саҳна санъати рэп низ аз донишкада дур гашт…

- Тӯли фаъолияти зиёда аз 6 сола (28-уми октябри соли 2008) аз бисёри рэперҳо аз қабили Акмал Ҷумаев, Ҷавлон, Набот, Лиро, Ига барои дастгирӣ ва маслиҳатҳои муфидашон бениҳоят миннатдор ҳастам ва дар куҷое аз РЭП сухан кунам, ҳатман аз ин коргардонҳои овоз ва рэперҳои олидараҷа зикр мекунам. Ҳангоми нахустин консертам, ки дар шаҳри Хуҷанд барпо намуда будем, аз Мастер Исмайл, ки ӯро устоди маънавии худ дар ин ҷода меҳисобам, тариқи телефон суҳбат кардем ва ӯ ба ман ҳамчун мутахассис ва санъаткори асили ин жанр дуо дод, ки боиси хушҳоливу шодии бепоёни ман гашт. Инчунин, овозхони эстрадӣ, оне ки бо шунидани садои ватандӯстонааш дилҳо реш-реш мегарданд – Тобиш Ҳилолӣ ба ман сӯҳбатҳои тӯлонӣ гузаронидааст ва чӣ гуна РЭП дуруст истифода карданро ба ман тавсия додааст. Ба он шӯҳрате, ки дорад, нигоҳ накарда, маро дар суруде худаш даъват кард. Дигар барои шахсе, ки доимо дар фикри он буд, ки кай ин нафарони бузурги саҳнаро ақалан аз дур боре бинад, хушбахтӣ зиёд намешавад. Чунки бо эшон ҳамкорӣ доштаву ҳамеша дар робита аст, - гуфт Масани.

Айни ҳол, чандин сурудҳои нав таълиф шудаанд, ки интизори сабт ҳастанд. Дар муддати наздиктарин пас аз дарёфт намудани вақти холӣ сабт хоҳанд шуд ва пешниҳоди ҳаводорони рэп хоҳанд гашт. Инчунин, банаворгирии клипҳо дар назар аст. Умедворем, ин лаҳзаҳо зудтар мерасанд, то аз сурудҳои нави Масани баҳра барем.

  Found_316617288_4147301.jpg  masani.jpg  34.jpg  SAM_1824.JPG



Отзывы

Возврат к списку